pvz rules... in heaven!

Mayat ti tatayabak… inyukradko pay a nalaing dagiti payyakko, ket dinanggayak ti aweng a kimmuyog iti pul-oy ti angin. Nagganas ti agtayab, nakalaglag-an ‘ti riknak.



“Masdan mo aking mata, ‘di mo ba nakikita


Ako’y lumilipad at nasa alapaap na….”


Adda nakitak a sumilap-sileng idiay asideg ti planeta a Saturn. Immasidegak ket diak ammo no agbabawiak wenno agbabawiak, ta idi makaasidegak ket kasla man adda nangigup kaniak nga alinuno iti law-ang. Wormhole kunan sa daytay nabuyak idi a sine. Iti apagdarikmat ket kaslaak nai-teleport iti maysa a nakadaldalus a lugar, napunno iti sunflowers ti aglawlaw. Idi damona ket diak maawatan no apay a sunflowers laeng dagiti sabsabong ngem napanunot ko nga amangan no haanda la a kayat a paasidegen dagiti zombies. Ta dagitoy kano sunflowers ti pangpaadu iti lawag a mangpapigsa kadagiti mulmula tapno adda manglapped kadagiti zombies nga agkaan ti utek. (Plugging Plants vs. Zombies, hehehe!)


Nakitak ni pareng Leo ket sinurotko isuna a napan nagpila iti adda karatulana nga “Ilokanos.” Ayos, isuna ti umuna iti pila ket nagtakderak iti likudanna.


Adda naganna a kuskusto daytoy a gayyemko ngem dina kayat nga ibaga ta managbabain la unay, ulitek, managbabain, haan a managbabai.


Nangegko ‘diay saritaanda ken’ daytay tugaw iti sanguananna. Tugaw kunak lattan ah ta haanko met a makita no siasinno diay nakatugaw. Makapurar. Mabutengak met ngarud a mangmatmat iti napaut ta narigat ‘ti mabulsek ama. ‘Namak payen, amangan no diakton a makita dagitay napupudaw a legs ni Etta a katrabahuak. Pinsarko pay met ngarud nga armen ta barbareng no isu ketdin ti naituding a kabinnuligko iti panagbiag tapnon umatiddog pay ti biag ti pulik. Nabayagen nga agur-uray daytoy kakaisuna a pusok a iti mangep-ep ti saem ‘di napaay nga ayan-ayat.


Ne-ay wen gayam, dandanik nalipatanen ni Leo. Nin’ sa ketdi Apo Dios diay kasarsaritana. Medio inyasidegko ti lapayagko tapno maka-eavesdrop-ak a nalaing, ket kastoy man ti naamadko a saritaanda:


“Napalalon ti kinaadu ti basol ti tao iti lubong, Leo, ket kayatko manen nga ukomen a kas iti inaramidko idi tiempo ni Noe,” kuna ‘diay nakatugaw a nakalawlawag. Intuloyna, “’ti napilik a kaputotan nga ibati ket dayta pulim. Ikkanka iti makatawen nga agaramid ti dakkel a daong ta layusek manen ti sangalubongan. Diakon kabaelan a kontrolen ti dinadakes ken kinapalangguad ti tao."


Kuna met ni Leo, “dayta a projectmo Apo ket diak sa kabaelan nga aramiden iti uneg ti uray sangapulo a tawen”


“Ta ania a gapu ket addaak met ditoy likudam?” inamad ni Apo.


“Dagitoy Apo ‘ti sumaganad a rason.” Ket binilangen ni Leo a sinaggaysa kadagiti ramayna dagiti nadumaduma a rason.


“1- Masapulko ti building permit,


2- Masapulko ti engineer, architect,plumber, electrician, trabahador, ken dadduma pay,


3- Diak mabalin ti agputed ti kayo ta agunget ti DENR,


4- Diak makaala iti agduduma nga animales ta adda animal rights tattan, ken addan dagiti mangay- aywan iti wildlife,


5- Awan unay maalak nga empleadon ta masapul ket magnaka ‘ti union dagiti obreros,


6- Adda dita ni taxman a nakanganga, ken uray ilibasko ti mapan agbakir ti kayo, awanen ti mabalin a kayo ta naganusda pay met amin.”






Isu a kunan ni Apo Dios "ala ngarud, balbaliwantanto ti agsarita 'no maminsanen, agsublika pay laeng idiay daga.”


Kinagiddan ti panangkalbitko iti kanawan a lapayag ni Leo tapnon lokuek koma ta ‘dinak pay nakita, ngem ‘diay panangikumpas ni Apo ‘ti tammudona ket isu metten ‘di panangakup ti naidumduma a lawag a nangisubli kadakami kenni Leo ditoy rabaw ti daga. 

Naisursurotak metten ket diak ammo no maayatanak wenno masayanganak a diak la ketdin nakasarita ni Apo. Pinilitko ti nagkidem manen barbareng no makasubliak idiay ta pinsarko ti dumawat iti sunflower barbareng no mapaadu ni inangko ta napintas kano a negosio daydiay, ngem nakapuotak laengen nga addaakon iti maikadua a paboritok a parte ti balay mi.